أفراح مصر

لكل عروسة فى مصر

محمد ناجى جدو

سلامو عليكم

يوم ماتش مصر و غانا فى النهائى كنت قاعد باتفرج على الماتش زى كل المصريين و فرحت جدا لما كسبنا البطولة و قعدت أهتف و عملت مظاهرة صغيرة على قد القهوة اللى كنت قاعد فيها و طلعنا على الشارع و بدات المظاهرة تكبر لغاية ما بقينا ييجى عشرتاشر بنى ادم و شوية ووصلنا على البحر و المظاهرات كانت هناك اكبر بكتير من المظاهرة بتاعتنا و صوتنا راح و احنا بنحاول نثبت ان احنا فرحانين اكتر من الناس اللى فى المظاهرات التانية لكن مفيش فايدة
كنا بنقول مصر و حسن شحاته يامعلم و رايحه فين ياخضرة بتاعت ماتش الجزائر أربعة – صفر
وهيصنا و زعقنا جامد و فى اغنية راب بتاعت الصديق العزيز زوكا ” قول مصر ” لكن اول ما طلعنا على البحر ضعنا
مظاهرات جامده قوى و كلها تستخدم صواريخ و زمامير و نار و بيرسول و اعلام كبيرة بتاعتنا و بتاعت الجزائر
وعربيات نقل و نص نقل و مليانه بنى ادمين فوق بعض

وكان الهتاف الوحيد عايز تهده هاتلوا جدو لكل المظاهرات

وبالتالى ياتقول عايز تهده هاتلوا جدو يا تروح

طبعا كل اللى كانوا معايا فى المظاهرة اللى انا طالع بيهم من القهوة باعونى و راحوا المظاهرات التانية عشان البنات و فضلت لوحدى

بس انا برغم انى اسكندرانى و عايش فى اسكندرية مبعتش المنتخب و مبعتش بلدى ورجعت على القهوة تانى عشان اجيب امدادات من الناس اللى اتفرجوا معانا

أول ما وصلت لقيتهم علقوا صورة لجدو و مكتوب عليها لو عايز تجيب جون كلم جدو على التليفون – مع تحيات كافتيريا ابو شوشة

رغم ان جدو مش اسكندرانى لكن بيلعب فى نادى الاتحاد السكندرى
ورغم ان جدو على حسب معلوماتى ماخدش لا دورى و لا كاس مع الاتحاد السكندرى
ورغم ان جدو جاتله عروض من اندية كتير قوى يعنى كده كده حيسيب الاتحاد فى خلال ايام
انما راجل و عمل شغل فى البطولة فى 130 دقيقة حقق لقب الهداف

انا معجب بيه جدا و يارب يكمل و ميتعوجش

بس يا اخوانا مصر اللى كسبت