أفراح مصر

لكل عروسة فى مصر

كله بيعمل دايرة

مساء الخير

كنت معزوم فى فرح واحد صاحبى من يومين فى واحد من أشهر الفنادق المس نجوم فى مصر و بصراحة شديدة أنا أول مرة أدخل الفندق و كنت تايه كأنى فى بلد تانية
المهم وصلت لقاعة الحفلات و كنت فاتح بقى على اخره من جمال القاعة و حلاوة الديكورات و كمية الورد و الحاجات اللى بتلمع و اللى مدلدله من السقف و اللى مفروشة على الارض

كارت الدعوة بمية الدهب و كل ترابيزة عليها أطباق صغيرة كده فيها مكسرات و حلويات صغيرة
و المتر كان لابس بدلة أنضف من بدلتى و سلمت عليه و باركتله أصلى كنت فاكرة بابا العروسة فى الاول

وبعدين الامتار الصغيرة اللى تحت ايده كانوا كتير قوى واحد بينزل أزايز ميه وواحد بيفتح الأزايز دى وواحد بيشيلها من قدامى بعدها بخمس دقايق و انا لسه مشربتش

واحد ييجى يشيل المكسرات ….. كنت حاضربه !!

المهم الناس كلها قاعده عادى و انا قاعد مش طايق نفسى مش عارف ليه

واخيرا صاحبى العريس وصل ومعاه عروسته اللى زى الملاك و فضلت ابص عليه شوية و عليها كتير
كانوا حلوين قوى و كنت فرحان جدا انه اخيرا اتجوز وربنا هداه

وبدأت الزفة وانا واقف اتفرج ……. كان نفسى أسلم عليه و أقوله مبروك لكن الجماعه بتوع الزفة شدوه و خلوه يرقص بالعصايا و البخور و الحصان وعينه مجتش فى عينى حتى

قلت أباركله لما يدخل القاعة

خلصت الزفة و بدأ الباشا المتر يعلن فرماناته و المترات الصغيرة بدأت تتحرك بشكل منتظم
أنزل بالشربات على الترابيزات
أدخل بالشو الاولانى
اطفى النور
مزيكا ……… مارشات ………. شو الشربات

مشاعل مشااااعل
انا باقول مشااااعل يا ***** يم

وصل الشو لغايه العريس والعروسة و بدأ المتر يدى تعليماته
شربها
بس كفايه
شربيه
بس كده
شربوا بعض
هات الكاسات

مزيكا …….. مارشات

افتح البيست ……..

فين عمرو …………. ؟؟؟؟؟

عمرو ده الدى جى على فكرة

فرست دانس
لو سمحتوا العريس و العروسة لوحدهم

حنعمل رقصة تانية ممكن تشاركوا فيها بعد دى

والرقصه التانية و بعدين أعملوا دايرة و الفرح ماشى و دخلوا بنات افريكان و عملوا شو و ولاد رقصوا مع بعض ماعرفهمش

و نرجع نعمل دايرة تانى

وهكذا كمل الفرح و الدايرة مقفولة على العريس و العروسة وانا مش عارف اسلم على صاحبى

وشوية كده سرحت و قعدت أفكر ايه الفرق بين الفرح ده و اى فرح تانى حضرته فى قاعه
وبدأت أفتكر لما العريس كان بيكلمنى و يقولى دفع قد ايه فى الفندق وان الفرح اتكلف اكتر من تمن الشقه ……..

لقيت فى الاخر كله بيعمل دايرة ويرقص

يمكن الشربات هنا 15 لون و المكسرات اكتر شوية

بس كله بيعمل دايرة و يرقص

الفرح اللى بـ 5000 جنية بيعملوا فيه دايرة
والفرح اللى بـ 15000000 جنية بيعملوا فيه دايرة