أفراح مصر

لكل عروسة فى مصر

عمرو اتجوز يا جدعااااااااان

ازف اليكم هذا النبأ العاجل الذى تناقلته بنات اسكندرية …. معظمهم يعنى

عمرو اتجوز ………….

للى مش عارفين عمرو هو الشاب المثالى و حلم كل بنت

اسمر شوية و صوته حنين و طويل و عريض و عضلات

شعر ناعم و سنانه بيضاء و ابتسامته عريضة

دمه خفيف و على طول فى مود لذيذ جدا حتى و هو صاحى من النوم

فنان و مجمل و لبق و عينيه ياخواتى على عينيه

وكمان مش فى دماغه لا حب و لا رومانسيه و لا عمره ضحك على بنت و لا علقها و لا اخد واحده هرى كعوب رجليها مشى على الكورنيش

ولا هجاص ولا فشار و لا بيتكلم كتير و لا بيجيب فى سيره حد وهو مش موجود

دايما مبتسم و تحس انه معندوش مشاكل

مؤهل عالى بكالوريوس و بيشتغل شغلانه محترمه و بيقبض مرتب هايل بالنسبه لسنه

مامته طيبه جدا و بابا راجل محترم قوى

عمرو خطب و اتجوز فى 3 شهور بس وبكده انهى الاضراب
طبعا مش حاحكيلكم على حالات الاغماء و الرغبه فى الانتحار واللى حلفوا مش حيتجوزا و الطيبين قوى كانوا بيدورا على واحده تعمل عمل للعروسة

المهم بعد كل ده عمرو اصبح زوج و له بيت و ان شاء الله اولاد و بنات و بكده تنتهى احلام معظم بنات اسكندرية الغلبانه اللى كانت مستنية عمرو يعجب بيها و يطلبها

خلاص مفيش عمرو بح

ننزل بقه لارض الواقع

لو كان نفسك فى واحد زى عمرو ممكن تقوليلى حياخدك ليه ؟؟

معلش سؤال بايخ أنا عارف

بس تعالى نشوف حضرتك حلوة يعنى ……… من الاخر كده مزة ؟ ولا تخينه و لا بكرش

مهتمه بنفسك .. شعرك وايديكى و رجليكى و ريحتك ؟؟؟؟

تمام ماشى ماشى متنفخيش فى وشى

طيب شيك فى لبسك ولا مقضياها اى حاجه ……. بنطلون و بدى

شيك ماشى

لغايه هنا اذا كانت اجابتك طبعا ممكن تتخطبى

نيجى للجواز بقه
طيب بتعرفى تطبخى ؟

عندك استعداد تعملى عزومة مثلا 5 او اكتر من الالف للياء ؟؟

بتحبى الاولاد …………… ؟ الصغيرين يعنى !

تقدرى تربى 3 او 4 ولاد

طيب ماما قالتلك لو جوزك متضايق تعملى ايه ؟
لو عنده مشكله مثلا فى شغله ممكن تساعديه ازاى ؟

لو حصلت مشكله بينك و بين جوزك تقدرى تحليها و لا حتلمى هدومك و تسيبى البيت ؟؟

تقدرى ؟؟؟

طيب لو عرفتى ان جوزك و ابو ولادك عينه زاغت على واحده تانيه !!!!!

ايه رأيك تتخانقى و تعملى ثورة و انقلاب اسرى و تصوتى و تلمى عليه الناس

وتطلبى الطلاق و تهدى المعبد على الكل و تشردى الولاد و تخسرى كل حاجه

ولا حتقدرى ترجعى جوزك لعش الزوجية و متسيبهوش لواحده تانية

من فضلك فكرى شوية

الجواز موضوع و شغلانه و لازم تبقى جاهزة

مش مانيكير و باديكيير و شنيون و بدى ضيق و بنطلون و مكياج

لان الراجل العاقل عارف ان المزة اللى عجبته بعد اول حمل حتتحول الى جروبى

استعدى عشان أخو عمرو بيفكر يخطب